تقرير رحلتي السريعة الى ماليزيا فبراير

السلام عليكم و رحمة الله و بركاته

تقرير وصلنا من احد المتابعات لحسابنا في تويتر

ملخص رحلتنا لماليزيا 2015

مخطط الرحلة كان كالتالي

يومين صنواي لاقون

ثلاث ايام بينانج

ثلاث ايام كوالالمبور

الحجوزات كانت كالتالي:

صنواي لاقون جناح عائلي مع الدخول لمرة واحدة لمدينة الالعاب المائية كلف 486 دولار استرالي

الحجز عن طريق موقع بوكينق شامل الافطار

بينانج تم حجز منتجع هوليداي ان بينانج غرفة مزدوجة مطله على الشاطئ الحجز كان عن طريق بوكينق ايضاً بدون افطار و كلف 730 استرالي

كوالالمبور حجزنا في فندق تريدرز جناح عائلي مطل على البرجين التوأم مع الافطار تم الحجز مباشرة من الفندق لانه كان غير متوفر من بوكينق وكان السعر 936 دولار استرالي

تقييم الفنادق

صنواي لاقون كان افضل اختياراتي من جميع النواحي .. الغرفة جداً راقية و نظيفة و البوفية متنوع يحتوي على جميع الاصناف تقريباً .. شرقي و غربي و اسيوي . استحق الخمسة نجوم بجداره … وقبل الذهاب لبينانج اعطيناهم شنط خاصه يوصلوها الى فندق تريدرز في كوالالمبور لاننا لم نكن بحاجتها في بينانج و لكي يسهل علينا التنقل ..

و طبعاً انصح و بشدة اللي بيزور ماليزيا ان يسكن في صنواي لاقون

الالعاب المائية جداً جداً رائعة و يوجد مول متصل بالفندق فيه كل الاحتياجات و المطاعم و السوبرماركت .

هوليداي ان بينانج كان جداً متواضع و الاثاث نوعاً ما قديم لا يرقى لمستوى 4 نجوم و ريحة الغرف رطوبة ما اعرف كيف اوصف و البوفية حمدت ربي اننا ما حجزنا الفطور مع الرفة لانه جربناه مره وحدة و كان سيئ و اصنافة محدودة غالبها الاكل الاسيوي .. الفندق ماعجبني ولو حصل و كررت الزيارة ما اسكنه ثاني

لكن للامانه عندهم خدمة حضانه الاطفال مجهزين روم بالالعاب للاطفال و جليسة اطفال مجاناً .. وفي حال ترغب في ترك الطفل و المغادرة يكلف فقط 20 رينجت للطفل ولابد من الحجز المسبق قبل بيوم .. و يميز الفندق موقعه القريب من السوق الليلي .. انا ماحبيت السوق الليلي لكن اشوف كثير عرب يشترون منه .

الاكتفتي كلها على شاطئ الفندق موجودة و اسعارها مناسبة

تم حجز الباراشوت اكبر مسافه كيلو متر واحد ب 200 رينجت

.تمنينا تجربة الجولة البحرية لكن لسوء الاحوال الجوية الغيناها

صادف و جودنا في بينانج راس السنه الصينية لذلك مزارع الفواكة كانت مغلقة

زرنا حديقة الفراشات و الطيور وكانت حلوة و ايضاً زرنا هضبة بينانج كانت حر مافرقت عن الاسفل الا ان الحرارة خفت بشكل نسبي

تنقلاتنا كانت مكلفة لأن تعاملنا مع سائق خاص اللي وصلنا من صنواي لاقون للمطار كلمه لنا عشان يستقبلنا وكان يقول انتبهوا من التكاسيالحمراء و انه قبل اسبوع استوت حادثة ان واحد من التكاسي هذي اخذ ناس على اساس يوصلهم و هددهم بالسكين و اخذ اللي معهم .. اتوقع انها كذبةمنه عشان نكمل معاه وللاسف زوجي صار كل طلعة يتفق معاه و الاسعار اللي ياخذها مننا مره مرتفععععه الين صار من بكرة نمشي قال اتصلوا علي بكرة ارجعكم للمطار قال زوجي بكم السعر كان 250 رينجت وحنا نمشي باللليل جنب الفندق شفنا تكسي سألناه كم للمطار قال 75 قلت انا 75 وطيرت عيوني شوي قال خلاص 70 قلنا اوك ورحنا معه اليوم الثاني …

جربنا مسبح خاص في فندق بايفيو بيتش في بينانج ..

تم تجربه المسبح الخاص في باي فيو .. ممتاز جدا الساعه١٧٥ رنجت وعطوني نص ساعه إضافية

تريدرز راقي نظيف و منظم ومن ضمن بكج الغرفة الدخول لنادي تريدرز من الساعه 5-7 وجبة خفيفة و طول اليوم مشروبات تقدم فيه مجاناً .. رأيي انصح فيه لزائري كوالالمبور

بكوالالمبور كانت تنقلاتنا كلها مع التكاسي العادية الزرقاء بالعدادا .. اول مشوارين كان يلفون بنا عشان يزيد العداد لكن باقي المشاوير صرنا نشغل الخرائط و نطلبه يمشي عليها

زرنا مدينه الألعاب كيدزانيا كانت جدا رائعه كلفتنا لطفل وزوجين ١٤٠ رنجت ألعابها جدا ممتعه للصغار
وتم زياره شارع العرب .. فيه مندي حضرموت حلو نوعا ما
النافورة الراقصه كانت روعه والمول التابع للبرجين التوأم كان مره حلوو
السوق الصيني شاينا تاون مازرناه لان ماعندنا حاجه مقلده نبي نشتريها ️
الاكواريوم كانت جدا جدا رائعه أوصي بزيارتها بشده .
سوق التايم سكوير رحنا فيه ماركات كثيره وتقريبا رخيص نوعا ما لكن ماحصلنا الملاهي الي قرينا عنها بالنت ..

بشكل عام الرحلة جميلة نوعاً ما

ضايقنا انه مافي تسعيرة ثابته لأغلب الاشياء بتكاسر بتاخذ بسعر افضل

وبشكل عام مافي مقارنة بين ماليزيا و استراليا و فانكفور اشوفها اقلهم مستوى

الاكل كان تقريباً نفس اسعارنا في الخليج مو نفس ماكنت اسمع انه رخيص و كذا .. مثلا ماكدونالدز حسابي 54 رينجت لوجبتين عادية ووجبة طفل ..

بشكل عام ماليزيا حلوه راحه نفسيه لما تسمع صوت الاذان بكوالا ولما وقفوا النافورة الراقصه وقت الاذان وكملوا بعد الصلاه

تمنياتي للجميع برحلات سعيدة موفقة

وهنا بعض الصور من فندق صنواي لاقون